Sunday, February 26, 2006

關於我關淑怡演唱會......好touching!!!

啱啱睇完Shirley嘅尾場演唱會,好精彩,亦好touching!!!

Shirley唱咗 "進化論" 作為佢今次演唱會嘅第一首歌,
之後仲同個女高音對唱咗 "帶我去跳舞",
跟住由 "關於我" 開始 ("關於我" 之後佢同林一峰合唱咗 "非愛不可"),
佢就由新至舊咁唱咗好多大家耳熟能詳嘅歌,
直至唱埋佢嘅第一首plug歌 "叛逆漢子"。當依家聽番佢唱啲舊歌,
竟然一啲都唔out,有啲仲係好in𠻹......犀利!!

表演嘉賓方面,第一晚係草蜢,第二晚係陳奕迅,
而今晚就係我至愛嘅明哥,
明哥出現當然唔少得同Shirley合唱番首 "萬福瑪利亞" 啦!!
佢哋之後仲合唱咗 "約定"。明哥今晚係咁鍚Shirley,好sweet。
之後Shirley就話今晚仲有好多朋友嚟咗......原來係草蜢,
佢哋響第一晚已經做咗表演嘉賓,估唔到尾場都有佢哋,
跟住我仲開始妄想陳奕迅都會做埋今晚嘅表演嘉賓𠻹!!
Shirley同草蜢合唱咗 "so sad" & "親愛的",佢哋跳舞真係好鬼死正!!

原本Shirley響encore時唱埋 "一首獨唱的旳歌" 就完場,
紅館啲燈已經開晒,連啲 "多謝你嚟睇關於我關淑怡演唱會....."
嘅廣播都播埋,但係好多觀眾都唔願走,係咁嗌Shirley...encore......
當Shirley再出嚟時,音樂奏起......"明年今日",全場鼓掌叫喊,
之後佢仲響觀眾伴唱下半喊半唱咁唱咗 "難得有情人" & "繾綣星光下",
當Shirley喊到唱唔到,觀眾就大大聲咁萬人大合唱,真係好感動!!!

Shirley今次真係做咗個good show,成個演唱會嘅製作都好得......
好耐無見過咁靚嘅舞台,燈光&其他效果嘅配合簡直一流。
Shirley啲衫同化妝亦好靚,好glamour。
Shirley嘅表現簡直掂到難以形容,佢唱得跳得就當然啦!!
最掂係佢一舉手一投足都咁有阿姐風範,勁壓台!!!

今晚個show咁正,觀眾亦有功勞,因為個個都好投入,
大家不停拍掌、叫喊、伴唱......各有各法咁支持Shirley。