Paul：叫兄弟實有啲嘢
軟硬演唱會前晚繼續玩嘉賓，兩人問黃貫中（Paul）沒有出席黃家強與日籍妻子的婚宴是否抗日及憶起大屠殺，阿Paul笑言預了被玩，更謂「做兄弟有今生冇來世，叫得兄弟實有啲嘢。」
軟硬天師在紅館舉行十場演唱會，前晚演出至第五場，請來黃貫中及恭碩良任嘉賓，容祖兒、葉世榮、王菀之及何超儀與丈夫陳子聰都有捧場。
談到軟硬敍述不和及兄弟情誼的新歌《好兄弟》，大部份歌詞都由阿Paul所寫，林海峰（阿Jan）說：「點解可以寫得咁貼題，你係咪將Beyond不和嘅真實嘢寫出嚟？」阿Paul笑說：「唔係，我預咗喺呢度係肉隨砧板上。兄弟嘅嘢好難講，邊個冇兄弟？有今生冇來世，叫得兄弟實有啲嘢。」
「我唔係抗日」
早前阿Paul缺席黃家強與日籍妻子的婚宴，阿Jan問道：「你哋係咪有問題，係咪抗日呀？點解家強結婚你唔去？」阿葛也插嘴說：「係咪諗起大屠殺？」阿Paul認真地說：「我嗰日都唔喺香港，我唔係抗日，人就係人，冇得分乜嘢人，我會憎某啲人，但唔會因為國籍而憎佢。」
整蠱恭碩良
恭碩良上台後，現場播放阿Jan打給他的整蠱電話，問到軟硬演出表現如何時，電話中的恭碩良說：「阿葛都可以，你就好musical，阿葛表演性多啲，你比較嚴肅。」阿Jan即在電話中假扮接受不到批評而狂哭，恭碩良即不好意思地說：「我好appreciate你打畀我，你係咪好大壓力呀？你唔好畀咁大壓力自己啦，我睇得出你做得好enjoy㗎。」
在電話中的阿Jan幾乎想笑，但還是哭說：「咁我唔得呀，唔講住。」隨即收線，此時台上四人已笑到碌地，觀眾也捧腹，被整蠱的恭碩良笑說：「影帝你都攞到呀！」
採訪、攝影：駱華齡
