免費試食

話說某日於萬寧買嘢，收銀阿姐找錢俾我時，跟手夾張紙仔，
唔使睇都知會係啲無乜用嘅coupon，就同阿姐講唔使喇！
一般情況下，啲阿姐都會收番，點知今次個阿姐好堅持，
仲話你要咗佢啦，正嘢嚟㗎！你講到咁，我邊好意思唔要。

之後睇下有幾正，原來係2張美心西餅coupon，
主角同樣係美心西餅新出嘅「天使蛋糕」:
第1張 - heading "免費試食", subhead "天使蛋糕切餅1件 (原價HK$19)"
第2張 - heading "$118", subhead "天使蛋糕現金優惠價 (原價HK$148)"

先講下前傳，「天使蛋糕」並唔係美心西餅始創，
佢嘅真身係Crunch Cake，美心西餅不過將佢大眾化，
尤其是改咗「天使蛋糕」呢個咁好嘅名，
呢期Crunch Cake咁hit, 美心西餅確實功不可沒。

美心西餅初推出「天使蛋糕」時，已經好想買件返嚟食下，
可惜一直都唔見散件裝。直至見到呢張coupon，先知已經有散件裝賣，
張coupon仲要大大隻字寫住 "免費試食"，緊係想第一時間去試啦，
可惜最下面有句細字 "有效期由2008年11月12日至18日"。

幾日後，經過樓下間美心西餅，醒起呢張coupon，就入咗去換啦，
點知個姐仔話萬寧客戶要購物滿$30先換得，就覺得奇奇地喇！
跟住就同佢講，我咪已經喺萬寧購物滿$30囉！
之後姐仔話，係要喺呢度購物滿$30呀！我就呆一呆，
我再同佢講兼指俾佢睇呢張coupon上面大大隻字寫住 "免費試食" 喎！
姐仔跟住指住下面啲細字讀 "萬寧客戶憑券於美心西餅選購任何產品
淨價滿$30，即可免費獲贈天使蛋糕切餅1件。"

即時火起，我知唔關姐仔事，所以已經立刻走出去，
但係團火就好耐都熄唔到...
只怪自己太大意，見到大大隻字寫住 "免費試食"，
就無留意啲T&C size嘅字，又中咗啲反宣傳計。

唔知幾時起，啲Marketing好鍾意搞啲咁嘅反宣傳，
以為有越多人入佢間舖，就越做多啲生意，
於是就樂此不彼咁出啲咁嘅coupon，
上面啲字就越寫越巧妙，用古惑嚟形容都不為過。

究竟啲Marketing有無諗過，我充滿期待咁入去排隊換件cake試食，
點知俾人局我要買$30嘢先有得試食件價值$19嘅cake，
正常人會有咩反應？你依家唔止賺唔到呢$30，
連我原本想用嘅$19都賺唔到，因為無發生呢件事的話，
我係好樂意用$19買件「天使蛋糕」嚟試下，
依家？多謝晒！你幫我慳番都唔知幾多個$19...

到依家都唔明，點解啲公司有咁多錢落Media，搞Branding，
偏偏又搞啲咁嘅反宣傳，無心益啲客，就唔好學人派coupon，
唔好下下都算到淨係你賺錢賺到盡先得㗎！
無coupon派無人會怪你，但係你派啲咁嘅反宣傳coupon，
只會令人對你公司反感，用幾多錢搞Branding都無補於事。

我無讀過Marketing都知道，顧客嘅忠誠度係每間公司嘅寶貴資產，
你咁做，無令顧客嘅忠誠度增加之餘，仲反而減少，
你為咗自以為會增加嘅短期利潤，得罪你嘅長期顧客！
做Marketing做到咁短視，都可謂香港特色之一！


後記：幾日後，想去買麵包做早餐，無去到樓下間美心西餅，
　　　反而捨近取遠咁去另一間麵包舖，行咁遠路就係為咗啖氣...
　　　後來同朋友講起呢件事，先發現我並不是唯一，
　　　原來各自都受過呢啲反宣傳，唔再幫襯只不過係基本步，
　　　其中有人嬲到要打上CS，都仲未下到啖氣！

　　　近日收到Crabtree & Evelyn寄嚟嘅郵件，
　　　內附幾張coupon，其中一張係免費換領Hand Cream 25ml，
　　　計起嚟大概價值$50，仲要有幾隻味俾你選擇，
　　　不枉我年中響你度使咁多錢。
　　　其實另外嘅coupon，都係啲買滿幾多送嘢嘅coupon，
　　　但係點解我無feel bad呢！因為啲coupon上面清清楚楚咁寫，
　　　我買都係心甘情願，你豪俾我，我會豪更多俾你，女人就係咁。
　　　請各Marketing向Crabtree & Evelyn好好學習！